Clown

E Gloon isch en Artist. Si Kunst isch s, d Mensche zum Stuune, Noochdänke und au zum Lache z bringe. Dr Begriff Gloon chunnt vom änglische Clown (und das isch äntwääder vom lat. colonus für „Buureglunggi“ abgläitet oder vom altnordische klunni mit dr gliiche Bedütig).

Glöön und Lustigi August findet mä vor allem im Zirkus. Dr tüpisch Zirkusgloon het vilmol farbigi Chläider aa, won em vil z grooss si, uf em Chopf e Berügge und e rooti Naase. S Gsicht isch im Allgemäine gschminkt. D Schue si mäistens riisig und as Kontrast spiile si mänggisch uf munzige Muusiginstrumänt oder faare uf Miniaturfaarzüüg. Si dräte mänggisch au as Stroossekünstler uf und in Spitääler düen sich mänggisch d Ärzt as Glöön verchläide, zum de Chinder d Angst vor de medizinische Behandlige z nee. Das funkzioniert nid immer, wil d Chinder Glöön vilmol nid lustig finde und sogar Angst vor ene häi. In Amerika het s Glöön, wo bi de Rodeo ufdräte. Si sölle dört nit nume d Zueschauer belustige, sondern au dr Muuni ablänke, wenn dä si Ridder abgworfe het und uf en losgoot.

Die chrankhafti Angst vor Glöön wird as Coulrofobii bezäichnet.